लोकसभा निवडणुकीनंतर राज्यातील राजकीय समीकरणांमध्ये बदल दिसून येत आहे. निवडणुकीपूर्वी भाजपमध्ये येणाऱ्या नेत्यांची संख्या कमी होत आहे, तर भाजपमधून इतर पक्षात जाणाऱ्यांची संख्या वाढत आहे. गेल्या आठवड्यात भाजपचे दोन प्रमुख नेते पक्ष सोडून गेले आहेत. संभाजीनगरचे माजी उपमहापौर राजू शिंदे आणि लातूरचे माजी आमदार विनायकराव पाटील यांनी पक्षाचा राजीनामा दिला आहे. आता भाजपचा आणखी एक माजी आमदार पक्ष सोडण्याची शक्यता आहे.
लोकसभा निवडणुकीत महाराष्ट्रात मोठे अपयश मिळाल्यामुळे भाजपला एकामागून एक धक्के बसत आहेत. संभाजीनगरचे माजी उपमहापौर राजू शिंदे काही नगरसेवकांसह ठाकरे गटात सहभागी झाले आहेत. भाजपने राजू शिंदे यांना मनविण्याचा शेवटपर्यंत प्रयत्न केला, पण त्यांनी आपला निर्णय बदलला नाही. यामुळे संभाजीनगरमध्ये भाजपसाठी हा मोठा धक्का मानला जात आहे. या धक्क्यातून सावरत असतानाच भाजपला आणखी एक मोठा धक्का बसणार आहे. मराठवाड्यातील भाजपचे माजी आमदार पक्ष सोडून शरद पवार गटात प्रवेश करणार आहेत, आणि त्यासाठी तारीखही निश्चित झाली आहे.
उदगीर विधानसभा मतदारसंघाचे माजी आमदार सुधाकर भालेराव यांनी भाजपला सोडण्याचा निर्णय घेतला आहे. विश्वसनीय सूत्रांच्या माहितीनुसार, ते ११ जुलै रोजी राष्ट्रवादी काँग्रेस शरदचंद्र पवार गटात प्रवेश करणार आहेत. सुधाकर भालेराव उदगीरमधील एक प्रभावशाली व्यक्ती आहेत आणि लातूर जिल्ह्यात त्यांचा मोठा प्रभाव आहे. त्यांच्या या निर्णयामुळे भाजपला मोठे नुकसान होणार असल्याचे सूत्रांनी सांगितले आहे.
शरद पवार गटाचे प्रदेशाध्यक्ष जयंत पाटील आणि शरद पवार यांच्या उपस्थितीत मुंबईच्या यशवंतराव चव्हाण सेंटरमध्ये हा पक्षप्रवेश सोहळा पार पडणार आहे. सुधाकर भालेराव हे राज्याचे क्रीडामंत्री संजय बनसोडे यांच्या विरोधात शरदचंद्र पवार पक्षातून, म्हणजेच महाविकास आघाडीतून, उदगीर विधानसभा मतदारसंघात निवडणूक लढवण्याची शक्यता आहे. त्यामुळे संजय बनसोडे यांना उदगीरमध्ये मोठे आव्हान मिळण्याची शक्यता आहे.
लातूर जिल्ह्यातील अहमदपूर मतदारसंघातील भाजपचे माजी आमदार विनायकराव पाटील यांचा राष्ट्रवादी काँग्रेस शरदचंद्र पवार गटात प्रवेश झालेला आहे. त्यामुळे लातूर जिल्ह्यात भाजपाचे दोन माजी आमदार शरद पवार गटात आले आहेत, ज्यामुळे शरद पवार गटाची ताकद लातूर जिल्ह्यात वाढत आहे. सूत्रांच्या माहितीनुसार, शरद पवार गटाने मराठवाड्याकडे अधिक लक्ष केंद्रीत केल्याचे दिसत आहे.
प्रतिनिधी: मृणाली जठार
*दलित टाइम्स उन करोड़ो लोगो की आवाज़ है जिन्हें हाशिए पर रखा गया है। *
महिला, दलित और आदिवासियों के मुद्दों पर केंद्रित पत्रकारिता करने और मुख्यधारा की मीडिया में इनका प्रतिनिधित्व करने के लिए हमें आर्थिक सहयोग करें।
